Минспорт Чувашии

Çĕмĕрлесем Валерий Ярды Олимп чемпионне аса илчĕç

Пирĕн паллă ентеш, Мюнхенри 20-мĕш Олимп вăййисен чемпионĕ Валерий Ярды çуралнăранпа çак кунсенче 70 çул çитрĕ. Çакна халалласа мухтавлă атлетăн тăван Çĕмĕрле районĕнче спорт уявĕ иртрĕ. Леонид Петров корреспондент каласа кăтартать. Леонид Петров, Никита Углев Валерий Ярды - Пĕренешрен. Халĕ унăн ячĕпе ялти урам хисепленсе тăрать. Тĕрлĕ çĕртен пухăннă хăнасем, тăванĕсем тата ял çыннисем чемпион çуралса ÿснĕ çурт умĕнче митинг ирттерчĕç. Кашни тухса калаçакан паллă спортсмена ырăпа аса илчĕ. Сывлăхĕ начаррипе пулас Олимп чемпионне тухтăрсем физкультура урокĕсенчен хăтарнă, иккен. Çапах та çирĕп кăмăллă ачашăн çакă чăрмав пулман. Валерий Поликарпов тренер хавхалантарнипе вăл 12 çулта йĕлтер çине тăнă. Пысăк çĕнтерÿ патне пĕрремĕш утăмсем тунă. Хăнасен йышĕнче Олимп чемпионĕн ывăлĕсем: Сергей тата Дмитрий пулчĕç. Вĕсем иккĕшĕ те пурнăçне спорта мар, медицинăна халалланă. Тен, мухтавлă аслашшĕн ĕçне мăнукĕсем тăсĕç. 1972 çулхи Олимпиадăна чылайăшĕ халĕ те лайăх ас тăваççĕ. Ун чухне велоспорт енĕпе СССР ушкăнĕ пурне те хыçа хăварса ылтăн медале тивĕçнĕ. Çĕнтерĕве туптакансен йышĕнче Валерий Ярды пулнă. Паян спортсмен ячĕ районта та, Чăваш Енре те пысăк хисепре. Пĕренеш ялĕнченех тухнă чăваш халăх артисчĕ Августа Уляндина ертсе пыракан пултарулăх ушкăнĕ те «Ярды» ятлă. Юрăç Олимп чемпионĕпе амăшĕ енчен тăванлă. «Ярды» тени искусствăра çитĕнÿ тума хистет, тет вăл. Уявра ушкăнсем бокс енĕпе, волейболла выляса тата йĕлтĕрпе чупса ăмăртрĕç. Мала тухнисем хаклă парнесемпе хисеп хучĕсене тивĕçрĕç. Пысăк çитĕнÿ тăвасси пĕчĕк çĕнтерÿрен пуçланать, палăртрĕç йĕркелÿçĕсем. Источник: http://chgtrk.ru/news/18248