Официальный портал органов власти Чувашской Республики

Чарусем çирĕпленеççĕ

Çĕнĕ çула килтех кĕтĕпĕр. Раштав уйăхĕн 30-мĕшĕнчи 23:00 сехетрен пуçласа кăрлач уйăхĕн 1-мĕшĕччен апатланмалли вырăнсен ĕçлемелле мар. Çитес çулăн пĕрремĕш кунĕнче вĕсем 12:00 сехетре уçăлĕç. Çакна паян кăшăллă вирус сарăлассипе кĕрешекен оперативлă штаб ларăвĕнче йышăнчĕç. Ку йыша кăшăллă вирусран таса вырăнсем те кĕреççĕ. «Эпидемиологи лару-тăрăвĕ çивĕч пулсан хăш-пĕр районсенче хушма чарусем кĕртме тӳр килет», – терĕ Чăваш Ен Пуçлăхĕ Олег Николаев. «Сыхлăх эмелне ярас ĕç тивĕçлĕ шайра йĕркелеменни куç кĕрет. Прививка тума килмеççĕ. Шурă халатлисем, больницăра çынсене пулăшмалла чухне, вăхăта сая ярса лараççĕ», – палăртрĕ вăл. Иртнĕ талăкра 143 çын кăшăллă вируспа чирленĕ, 22-шĕ амака парăнтарайман. Вацинаци – чи шанчăклă мел пулсан та прививка тăвакансен хисепĕ чакса, чирлекенсен шучĕ ӳссе пырать. Сăмахран, транспорт тытăмĕнче амак çаклатакансен шучĕ 28 процент хăпарнă. Çакна шута илсе Олег Николаев халăха турттармалли транспортра сыхлăх йĕркисене çирĕплетме сĕнчĕ. «Кашни çын маска тăхăнмасăр тимĕр утăн хускалмалла мар. Йĕркене хушура çирĕплететпĕр», – терĕ вăл. Шел пулин те, кăшăллă вирус çамрăклансах пырать. Шкулсемпе ача сачĕсенсе чирлекенсен хисепĕ йышланать. ВЕРА ГОЛОВАЧ: «Шкулсенче тата ача сачĕсенче çĕнĕ çул уявне ирттерме юрать, анчах класспа е ушкăнпа кăна. Ашшĕ-амăшсен те приивка тунисем кăна унта килме пултараççĕ». Чăваш Ен сывлăх сыхлав министерстви пĕлтернĕ тăрăх, республикăра 500 000 ытла çын прививка тунă. Чир сарăласссине шута илсе 60 çултан аслăраххисен, аслă шкулсемпе колледж тата техникумсенче вĕренекенсен, промышленность тата ял хуçалăх предприясенче ĕçлекенсен сыхлăх эмелне ăша ямалла. Прививка тусан ĕçрен хушма икĕ канмалли кун пулĕ. Çак йĕркесене те хушура çирĕплетрĕç.